ئەم کتێبە بریتییە لە لێکدانەوە و ڕاڤەی هەڵبژاردەیەک لە شیعری نالی. شێوەی کارەکە وەهایە کە سەرەتا پێشەکییەک لە سەر ئەدەبی کوردیی ناوەندی و باڵی شیعر لەم ئەدەبەدا ئاراستە کراوە. ئینجا کورتەیەک لە سەر ژیان و کەسایەتیی نالی بە کەڵک وەرگرتن لە نوێترین سەرچاوە و توێژینەوەکان هاتووە. ڕاڤە و لێکدانەوەکەش وەهایە کە سەرەتا کێشی شیعرەکە دیاری کراوە؛ ئینجا پوختەیەک لە سەر ئەو شیعرە و گرنگی و تایبەتمەندییە بەرچاوەکانی پێشکەش کراوە. دوایە بەیت بە بەیت وشە گرانەکانی شرۆڤە کراوە. لە بەشێکیشدا هەندێ پرسیار و بابەت بۆ لێکۆڵینەوە و بەدواداچوونی زۆرتر ڕێک خراوە. کتێبەکە بە شێوەی وانە بە وانە پێک هاتووە. هەر وانەیەک بابەتێک و پرسیار و تێفکرینی تایبەتی بۆ ئامادە کراوە.
